അയര്‍ലണ്ടില്‍ പുതുതായി വീട് വാടകയ്ക്ക് എടുക്കുന്നവര്‍ നല്‍കേണ്ടിവരുന്ന ശരാശരി മാസവാടക 1,595 യൂറോ ആയി ഉയര്‍ന്നു. മുന്‍ വര്‍ഷത്തെ അപേക്ഷിച്ച് 133 യൂറോ അധികമാണിത്. നിലവിലെ വാടകക്കാരുടെ ശരാശരി വാടകനിരക്ക് 1,374 യൂറോ ആയിരിക്കെയാണ് ഇത്. Residential Tenancies Board (RTB)-ന്റെ 2023 നാലാം പാദ റിപ്പോര്‍ട്ട് പ്രകാരം, 2023-ല്‍ 9.1% ആണ് രാജ്യത്ത് പുതുതായി വാടകയ്ക്ക് നല്‍കപ്പെടുന്ന വീടുകളുടെ വാടക നിരക്ക് ഉയര്‍ന്നത്.
പ്രാദേശിക കണക്കെടുത്താല്‍ പുതുതായി വാടക വീടെടുക്കുന്നവരുടെ വാടക വര്‍ദ്ധന ഏറ്റവുമധികം ബാധിച്ചത് ലിമറിക്ക് സിറ്റിയെയാണ്. പോയ വര്‍ഷം 22.1% ആണ് ഇവിടെ വാടക വര്‍ദ്ധിച്ചത്. മറുവശത്ത് വാടക ഏറ്റവും കുറവ് വര്‍ദ്ധന രേഖപ്പെടുത്തിയത് വാട്ടര്‍ഫോര്‍ഡ് സിറ്റിയിലാണ്- 5 ശതമാനം.
ഡബ്ലിനില്‍ പുതുതായി വാടകയ്ക്ക് താമസിക്കുന്നവര്‍ നല്‍കേണ്ടത് മാസം ശരാശരി 2,098 യൂറോ ആണ്. കോര്‍ക്കില്‍ ഇത് മാസം 1,400 യൂറോയുമാണ്.
രാജ്യത്ത് പുതുതായി വീട് വാടകയ്‌ക്കെടുക്കുന്നവരില്‍ 29.7% പേരും മാസം 2,000 യൂറോയ്ക്ക് മുകളില്‍ വാടക കൊടുക്കേണ്ടി വരുന്നുവെന്നും റിപ്പോര്‍ട്ട് വ്യക്തമാക്കുന്നുണ്ട്. 13.6% പേര്‍ 2,500 യൂറോയ്ക്ക് മുകളിലും വാടക നല്‍കേണ്ടിവരുന്നു.
നിലവിലെ വാടകക്കാരില്‍ 2,000 യൂറോയ്ക്ക് മുകളില്‍ വാടക കൊടുക്കുന്നവര്‍ 15.7% ആണ്. 2,500 യൂറോയ്ക്ക് മുകളില്‍ നല്‍കുന്നവരാകട്ടെ 5.6 ശതമാനവും.
പുതിയ വാടകക്കാരില്‍ 19.2% പേര്‍ക്ക് മാത്രം മാസം 1,000 യൂറോയ്ക്ക് താഴെയുള്ള വീടുകള്‍ ലഭിക്കുമ്പോള്‍, നിലവിലെ വാടകക്കാരില്‍ 34% പേര്‍ 1,000 യൂറോയ്ക്ക് താഴെ വാടക നല്‍കി രാജ്യത്ത് ജീവിക്കുന്നുണ്ട്.
