അയര്‍ലണ്ടില്‍ ആദ്യമായി വീട് വാങ്ങുന്നവര്‍ക്ക് (ഫസ്റ്റ് ടൈം ബയോഴ്‌സ്) നല്‍കുന്ന മോര്‍ട്ട്‌ഗേജ് 12 മാസത്തിനിടെ ഏറ്റവും ഉയര്‍ന്ന നിലയില്‍. Banking and Payments Federation (BPFI)-ന്റെ റിപ്പോര്‍ട്ട് പ്രകാരം, ഒക്ടോബറില്‍ അനുവദിച്ച 4,273 മോര്‍ട്ട്‌ഗേജുകളില്‍ 2,687 എണ്ണവും ഫസ്റ്റ് ടൈം ബയേഴ്‌സിനാണ്.
ഇതിന് പുറമെ ആകെ മോര്‍ട്ട്‌ഗേജ് അനുമതികളുടെ എണ്ണത്തിലും സെപ്റ്റംബറിനെ അപേക്ഷിച്ച് ഒക്ടോബറില്‍ 2.7% വര്‍ദ്ധന ഉണ്ടായിട്ടുണ്ട്. എന്നാല്‍ മുന്‍ വര്‍ഷത്തെ അപേക്ഷിച്ച് 20.1% കുറവാണിത്. ആകെ തുകയുടെ കാര്യത്തിലാകട്ടെ 16.9% കുറവ് വന്നിട്ടുണ്ട്.
ഒക്ടോബര്‍ മാസത്തില്‍ അനുവദിക്കപ്പെട്ട ആകെ മോര്‍ട്ട്‌ഗേജ് മൂല്യം 1,214 മില്യണ്‍ യൂറോയാണ്. ഇതില്‍ 793 മില്യണും ലഭിച്ചത് ഫസ്റ്റ് ടൈം ബയേഴ്‌സിനാണ്. ആകെ തുകയുടെ 62.9% വരും ഫസ്റ്റ് ടൈം ബയേഴ്‌സിന് അനുവദിച്ച മോര്‍ട്ട്‌ഗേജുകളുടെ മൂല്യം.
ഒക്ടോബര്‍ മാസത്തിലെ ശരാശരി മോര്‍ട്ട്‌ഗേജ് തുക 295,033 യൂറോയാണെന്നും റിപ്പോര്‍ട്ട് വ്യക്തമാക്കുന്നു.
