അയർലണ്ടിൽ കൊലപാതകം, കൊള്ള, മയക്കുമരുന്ന് കേസുകളിൽ പെടുന്ന കുട്ടികളുടെയും കൗമാരക്കാരുടെയും എണ്ണത്തിൽ വർദ്ധന

പൊതുവെ കേസുകളില്‍ കുട്ടികള്‍ കുറ്റക്കാരാകുന്നത് കുറഞ്ഞെങ്കിലും, അയര്‍ലണ്ടില്‍ കൊലപാതകം, കൊല്ലുമെന്ന് ഭീഷണിപ്പെടുത്തല്‍, മയക്കുമരുന്ന് ഉപയോഗിക്കല്‍, കൊള്ള, തോക്ക് അടക്കമുള്ള ആയുധങ്ങളുടെ ഉപയോഗം എന്നീ കേസുകളില്‍ പെടുന്ന കുട്ടികളുടെയും കൗമാരക്കാരുടെയും എണ്ണം വര്‍ദ്ധിച്ചതായി റിപ്പോര്‍ട്ട്. കോവിഡ് ആരംഭിച്ച വര്‍ഷമായ 2020-ലെ കണക്കുകളാണിത്.

ഇവയ്ക്ക് പുറമെ കുട്ടികളുടെ അശ്ലീലദൃശ്യങ്ങള്‍ പ്രചരിപ്പിക്കുക/കൈവശം വയ്ക്കുക, മൃഗങ്ങളെ ഉപദ്രവിക്കുക, റോഡ്‌നിയമം ലഘിക്കുക എന്നീ കുറ്റകൃത്യങ്ങള്‍ ചെയ്യുന്ന കുട്ടികളുടെ എണ്ണത്തിലും വര്‍ദ്ധനയുണ്ടായതായി Garda Youth Diversion Programme (GYDP) പുറത്തുവിട്ട കണക്കുകള്‍ വ്യക്തമാക്കുന്നു. 18-ന് വയസിന് താഴെയുള്ളവരെയാണ് കുട്ടികളും കൗമാരക്കാരുമായി കണക്കാക്കുന്നത്.

അതേസമയം 2019-നെ അപേക്ഷിച്ച് 2020-ല്‍ കുട്ടികള്‍ പ്രതികളാകുന്ന കേസുകളില്‍ 12 ശതമാനത്തിലേറെ കുറവ് സംഭവിച്ചിട്ടുണ്ട്. 2020-ല്‍ ഇത്തരം 16,301 കേസുകള്‍ റിപ്പോര്‍ട്ട് ചെയ്യപ്പെട്ടപ്പോള്‍, 2019-ല്‍ ഇത് 18,551 ആയിരുന്നു.

എന്നാല്‍ ഉണ്ടായ കേസുകള്‍ പരിശോധിക്കുമ്പോള്‍ 2020-ല്‍ കൊലപാതകത്തിന് പിടിക്കപ്പെട്ട കുട്ടികളുടെ എണ്ണം നാലായി ഉയര്‍ന്നു. 2019-ല്‍ ഇത് രണ്ടായിരുന്നു. ഒപ്പം 2020-ല്‍ കൊലപാതകശ്രമത്തിന് അ#്ച് കുട്ടികളും പിടിയിലായി.

2020-ല്‍ കൊലപാതകഭീഷണി മുഴക്കിയതിനും, ആക്രമിച്ചതിനും പിടിയിലായത് 74 കുട്ടികളാണ്. 2019-നെക്കാള്‍ 61% അധികമാണിത്. കൊള്ള നടത്തിയതിന് പിടിയിലായത് 299 പേരാണ്. മുന്‍ വര്‍ഷത്തെക്കാള്‍ 13% അധികമാണിത്.

മയക്കുമരുന്ന് ഉപയോഗവുമായി ബന്ധപ്പെട്ട് 2020-ല്‍ 1,926 കുട്ടികളാണ് അറസ്റ്റ് ചെയ്യപ്പെട്ടത്. 2019-നെ അപേക്ഷിച്ച് 8% ആണ് വര്‍ദ്ധന. അതേസമയം ഇതില്‍ മിക്ക കേസുകളും നിയമവിരുദ്ധമായ വസ്തു കൈവശം വച്ചു എന്നതിന് മാത്രമാണ്.

തോക്ക് അടക്കമുള്ള ആയുധങ്ങള്‍ ഉപയോഗിച്ചതിന് 2020-ല്‍ 537 കേസുകളിലാണ് കുട്ടികള്‍ പ്രതികളായത്. 9% ആണ് മുന്‍വര്‍ഷത്തെക്കാള്‍ വര്‍ദ്ധന.

മോഷണം ആണ് ഏറ്റവുമധികം കുട്ടികള്‍ ചെയ്ത കുറ്റം. 2020-ല്‍ 4,005 കുട്ടികളാണ് ഇത്തരം കേസുകളില്‍ പിടിയിലായത്. കുട്ടികള്‍ക്കെതിരായ ആകെ കേസുകളില്‍ 25% വരും ഇത്. എന്നാല്‍ 2019-നെക്കാള്‍ 29% കുറവാണിത്.

പീഡനം അടക്കമുള്ള കുട്ടികള്‍ ഉള്‍പ്പെട്ട 336 ലൈംഗികകുറ്റകൃത്യങ്ങള്‍ 2020-ല്‍ റിപ്പോര്‍ട്ട് ചെയ്യപ്പെട്ടു. 53 എണ്ണം പീഡനമാണ്. 2019-നെ അപേക്ഷിച്ച് 16% കുറവാണിത്.

അതേസമയം ചൈല്‍ഡ് പോണോഗ്രാഫിയുമായി ബന്ധപ്പെട്ട കേസുകള്‍ 42% ഉയര്‍ന്ന് 78 ആയി.

റോഡ്‌നിയമം ലംഘിച്ചതിന് കുട്ടികള്‍ പിടിയിലായ കേസുകള്‍ 1,405 ആണ്. വര്‍ദ്ധന 7%.

കുട്ടികള്‍ മൃഗങ്ങള്‍ക്ക് നേരെ അക്രമം കാട്ടിയ സംഭവങ്ങള്‍ 25 ആണ്. കോവിഡ് നിയമം ലംഘിച്ചതിന് 37 പേരും പിടിയിലായി.

കോടതിയിലല്ലാതെ കുട്ടികള്‍ പിടിക്കപ്പെടുന്ന കേസുകള്‍ കൈകാര്യം ചെയ്യുന്നതിനായി 2003-ലാണ് Garda Youth Diversion Programme (GYDP) രൂപീകരിച്ചത്. കേസുകളില്‍ പ്രതികളാകുന്ന 12 മുതല്‍ 18 വരെ പ്രായമുള്ള കുട്ടികളെ കോടതിയില്‍ കൊണ്ടുവരും മുമ്പ് GYDP-യില്‍ എത്തിക്കും. GYDP ഗാര്‍ഡ സൂപ്രണ്ടാണ് പ്രതിയെ കോടതിയില്‍ ഹാജരാക്കണോ അതോ പ്രതി GYDP-യില്‍ തുടരണോ എന്ന് തീരുമാനിക്കുക.