ഡബ്ലിനിലെ Clondalkin-ല്‍ ചെറുപ്പക്കാരനെ ആക്രമിച്ച് കൊള്ള നടത്തിയ നാല് കൗമാരക്കാരെ ഗാര്‍ഡ പിടികൂടി. ഞായറാഴ്ച രാത്രി 8 മണിയോടെയാണ് Grand Canal Banks-ന് തീരത്ത് വച്ച് 30-ലേറെ പ്രായമുള്ള ചെറുപ്പക്കാരന്‍ കൊള്ളയടിക്കപ്പെട്ടത്.
സംഭവത്തില്‍ ഉടനടി അന്വേഷണമാരംഭിച്ച ഗാര്‍ഡ മണിക്കൂറുകള്‍ക്കകം കൊള്ള നടത്തിയ നാല് പേരെയും പിടികൂടി. ഇവര്‍ ഉപയോഗിച്ചിരുന്ന ഇലക്ട്രിക് സ്‌കൂട്ടറും പിടിച്ചെടുത്തു.
അറസ്റ്റിലായവരെ Ballyfermot, Clondalkin സ്റ്റേഷനുകളിലേയ്ക്ക് കൊണ്ടുപോയെങ്കിലും, കേസ് ചുമത്താതെ വിട്ടു. Juvenile Liaison Officer-ക്ക് കേസ് ഫയല്‍ നല്‍കിയ ശേഷം, അദ്ദേഹത്തിന്റെ നിര്‍ദ്ദേശപ്രകാരമാകും കേസിലെ തുടര്‍നടപടികള്‍.
സംഭവത്തിന് ദൃക്‌സാക്ഷികളായ ആരെങ്കിലുമുണ്ടെങ്കില്‍ തങ്ങളെ ബന്ധപ്പെടണമെന്ന് ഗാര്‍ഡ അഭ്യര്‍ത്ഥിച്ചിട്ടുണ്ട്.
