ബ്രിസ്റ്റോള്‍: പരിശുദ്ധ മാതാവിന്റെ സ്വര്‍ഗാരോപണ തിരുനാളും ഇന്ത്യന്‍ സ്വാതന്ത്ര്യദിനവും ബ്രിസ്റ്റോള്‍ സീറോ മലബാര്‍ പള്ളി സമുചിതമായി ആചരിക്കുന്നു.
ഓഗസ്റ്റ് 15നു (ശനി) രാവിലെ 10.30നു ഫിഷ് പോണ്ട്‌സ് സെന്റ് ജോസഫ്‌സ് പള്ളിയിയില്‍ നടക്കുന്ന ആഘോഷമായ തിരുനാള്‍ കുര്‍ബാനയ്ക്കും അനുബന്ധ കര്‍മ്മങ്ങള്‍ക്കും ഫാ. പോള്‍ വെട്ടിക്കാട്ട് മുഖ്യകാര്‍മികത്വം വഹിക്കും.
വിശുദ്ധ കുര്‍ബാനയ്ക്കുശേഷം ഫിഷ്‌പോണ്ട്‌സ് വാസല്‍ പാര്‍ക്കില്‍ എല്ലാവരും പങ്കുചേരുന്ന ‘കുടുംബ വിനോദ കൂട്ടായ്മ’ പ്രത്യേക അനുഭവമാകും. വടം വലിയും മറ്റു കായിക മത്സരങ്ങളും ബാര്‍ബിക്യുവും കൂട്ടായ്മയ്ക്ക് ഇരട്ടി മധുര മേകും. കാലാവസ്ഥ പ്രതികൂലമായാല്‍ ‘വിനോദ കൂട്ടായ്മ’ പരിപാടിയില്‍ മാറ്റം വരുത്തുമെന്നു കൈക്കാരന്മാരായ ജോണ്‍സന്‍ അടപ്പൂര്‍, സിജി വാധ്യാനത് എന്നിവര്‍ അറിയിച്ചു.
വിശുദ്ധീകരണ ധ്യാനം ഓഗസ്റ്റ് 21 (വെള്ളി) മുതല്‍ 23 (ഞായര്‍) വരെയാണ്. കുടുംബത്തിന് താമസത്തിനും ഭക്ഷണത്തിനും 200 പൗണ്ടും മുതിര്‍ന്നവര്‍ക്ക് 70 പൗണ്ടും കുട്ടികള്‍ക്ക് 35 പൗണ്ടുമാണു നിശ്ചയിച്ചിരിക്കുന്നത്.ബ്രിസ്റ്റോളില്‍ ആദ്യമായി നടത്തുന്ന താമസിച്ചുള്ള ധ്യാനത്തില്‍ പങ്കെടുക്കുന്നവര്‍ക്ക് നവ്യാനുഭവമേകും.
ബ്രദര്‍ സാബു അരുതോട്ടിയില്‍ നയിക്കുന്ന ധ്യാനത്തിന് ഇനിയും രജിസ്റ്റര്‍ ചെയ്യാവുന്നതാണെന്ന് ഫാ. പോള്‍ വെട്ടിക്കാട്ട്, ജോണ്‍സന്‍ മാത്യു (കൈക്കാരന്‍) 07737960517 എന്നിവര്‍ അറിയിച്ചു.
റിപ്പോര്‍ട്ട്: മാനുവല്‍ മാത്യു
