‘ദൈവമാണ് നിന്നെ ഇങ്ങനെ സൃഷ്ടിച്ചത്’ – ഫ്രാന്‍സിസ് മാര്‍പാപ്പ സ്വവര്‍ഗ്ഗാനുരാഗിയോട് പറഞ്ഞതായി വെളിപ്പെടുത്തല്‍

ദൈവമാണ് നിന്നെ സ്വവര്‍ഗ്ഗാനുരാഗിയാക്കിയതെന്നും അവന്‍ നിന്നെ സ്‌നേഹിച്ച് അനുഗ്രഹിച്ചിരിക്കുന്നുവെന്നും ഫ്രാന്‍സിസ് മാര്‍പാപ്പ പറഞ്ഞതായി ഗേയുടെ വെളിപ്പെടുത്തല്‍. ചിലിയിലെ ഏറ്റവും കുപ്രസിദ്ധനായ ഒരു പെഡോഫൈല്‍ തന്നെ ലൈംഗികമായി ചൂഷണം ചെയ്തതിനെ കുറിച്ച് പോപ്പിനോട് രഹസ്യമായി സംസാരിച്ച ജുവാന്‍ കാര്‍ലോസ് ക്രൂസിനോടാണ് റോമന്‍ കത്തോലിക്കാ സഭയുടെ നേതാവായ പോപ്പ് ശ്രദ്ധേയമായ അഭിപ്രായപ്രകടനം നടത്തിയിരിക്കുന്നത്. ലാറ്റിനമേരിക്കന്‍ രാജ്യങ്ങളിലെ ചില ബിഷപ്പുമാര്‍ അദ്ദേഹത്തെ ലൈംഗികവൈകൃതമുള്ളവനായി മുദ്രകുത്തുകയും അതിക്രമത്തെക്കുറിച്ച് താന്‍ കള്ളം പറയുകയാണെന്ന് പ്രചരിപ്പിക്കുകയും ചെയ്യുന്നതായി അദ്ദേഹം പോപ്പിനോട് പരാതിപ്പെട്ടിരുന്നു.

‘നിങ്ങള്‍ ഒരു ഗേയാണ് എന്നതൊന്നും ഒരു പ്രശ്‌നമല്ല. ദൈവമാണ് നിങ്ങളെ ഇങ്ങനെ സൃഷ്ടിച്ചത്. അവന്‍ ഇങ്ങനെത്തന്നെ നിന്നെ സ്‌നേഹിക്കുകയും ചെയ്യും. പോപ്പും നിന്നെ ഇങ്ങനെത്തന്നെ സ്‌നേഹിക്കും. നീ നീയായിത്തന്നെ തുടരുക’ പോപ്പ് പറഞ്ഞതായി സ്പാനിഷ് പത്രമായ എല്‍ പിയസിന് നല്‍കിയ അഭിമുഖത്തില്‍ ക്രൂസ് പറഞ്ഞു. 2011-ല്‍ ക്രൂസിനെ അപമാനിച്ച ഫെര്‍ണാണ്ടോ കാരാഡിമ എന്ന 87കാരന്‍ കുറ്റക്കാരനാണെന്ന് അടുത്തിടെ കോടതി കണ്ടെത്തിയിരുന്നു. എന്നാല്‍ പോപ്പുമായുള്ള ക്രൂസിന്റെ സംഭാഷണത്തെക്കുറിച്ച് വത്തിക്കാന്‍ ഇതുവരെ പ്രതികരിച്ചിട്ടില്ല.

വിവാഹത്തിനു ശേഷം ആണും പെണ്ണും തമിലുള്ള ലൈംഗിക ബന്ധമല്ലാത്ത എല്ലാം പാപമാണെന്നാണ് കത്തോലിക്കാ സഭ പഠിപ്പിക്കുന്നത്. എന്നാല്‍ എല്ലാതരം അനുരാഗങ്ങളെക്കുറിച്ചും ഫ്രാന്‍സിസ് മാര്‍പാപ്പക്ക് തുറന്ന കാഴ്ച്ചപ്പാടാണുള്ളത്. സ്വവര്‍ഗാനുരാഗ ലോബിയെകുറിച്ച് മുന്‍പ് ഒരു പത്രപ്രവര്‍ത്തകന്‍ ചോദ്യമുന്നയിച്ചപ്പോള്‍ അതൊക്കെ വിലയിരുത്താന്‍ ഞാന്‍ ആരാണ് എന്നായിരുന്നു പോപ്പിന്റെ മറുപടി. സ്വവര്‍ഗാനുരാഗവും ദൈവ സൃഷ്ടിതന്നെയാണെന്നും ആരും സ്വയം തിരഞ്ഞെടുക്കുന്നതല്ലെന്നുമാണ് പോപ്പിന്റെ വിശ്വാസമെന്ന വിലയിരുത്തലുകള്‍ നേരത്തേ ഉണ്ടായിരുന്നു.

 

 

ഡികെ

Share this news

Leave a Reply

%d bloggers like this: