നടിയെ ആക്രമിച്ച കേസില് നടന് ദിലീപ് 85 ദിവസത്തെ ജയില് വാസത്തിന് ശേഷം പുറത്തിറങ്ങി. സഹോദരന് അനുപടക്കം ആലുവ ജയിലിന് പുറത്ത് വലിയ ജനക്കൂട്ടമാണ് താരത്തെ സ്വാഗതം ചെയ്തത്. ജയിലില് നിന്നും പുറത്തിറങ്ങിയ ദിലീപ് സഹോദരനും ബന്ധുക്കള്ക്കുമൊപ്പം വീട്ടിലേക്ക് തിരിച്ചു. കര്ശന ഉപാധികളോടെയാണ് ഹൈക്കോടതി ദിലീപിന് ജാമ്യം അനുവദിച്ചിരിക്കുന്നത്. മധുരം വിതരണം ചെയ്തും ദിലീപിന് ജയ് വിളിച്ചും, നടന്റെ ഫ്ലക്സില് പാലഭിഷേകം നടത്തിയുമാണ് ആരാധകര് ആഹ്ലാദം പ്രകടിപ്പിച്ചത്.
പ്രോസിക്യൂഷന്റെ ശക്തമായ എതിര്പ്പ് മറികടന്നാണ് കോടതി ജാമ്യം അനുവദിച്ചിരിക്കുന്നത്. കഴിഞ്ഞ മാസം 27 ന് ഹര്ജിയില് വാദം പൂര്ത്തിയായതിനെ തുടര്ന്ന് വിധി പറയാന് ഇന്നത്തേക്ക് മാറ്റുകയായിരുന്നു. കര്ശന ഉപാധികളോടെയാണ് ദിലീപിന് ജാമ്യം അനുവദിച്ചിരിക്കുന്നത്.
അഞ്ചാം ജാമ്യഹര്ജിയിലാണ് ദിലീപിന് ജാമ്യം ലഭിച്ചിരിക്കുന്നത്. നേരത്തെ ഹൈക്കോടതിയും അങ്കമാലി മജിസ്ട്രേറ്റ് കോടതിയും രണ്ട് തവണവീതം ദിലീപിന്റെ ജാമ്യഹര്ജി തള്ളിയത്. നീണ്ട 86 ദിവസത്തെ ജയില് വാസത്തിന് ശേഷമാണ് ദിലീപിന് ജാമ്യം ലഭിച്ചിരിക്കുന്നത്. ഒരു ലക്ഷം രൂപയുടെ ബോണ്ടിലാണ് കോടതി ജാമ്യം അനുവദിച്ചിരിക്കുന്നത്.
പ്രോസിക്യൂഷനെതിരെ ഗുരുതരമായ ആരോപണങ്ങള് ഉയര്ത്തിയായിരുന്നു ദിലീപിന്റെ അഭിഭാഷകന് ജാമ്യത്തിനായി വാദിച്ചത്. കേസ് അന്വേഷണത്തിന്റെ ഒരു വിവരങ്ങളും പൊലീസ് തന്റെ കക്ഷിയെ അറിയിക്കുന്നില്ലെന്ന് ദിലീപിന് വേണ്ടി ഹാജരായ ബി രാമന് പിള്ള പറഞ്ഞു. റിമാന്റ് റിപ്പോര്ട്ടില് പോലും പൊലീസ് ഒരു വിവരവും രേഖപ്പെടുത്തുന്നില്ല. തന്റെ പേരിലുള്ള കുറ്റങ്ങള് അറിയാനുള്ള അവകാശം പോലും ദിലീപിന് നിഷേധിക്കുകയാണെന്ന് അഭിഭാഷകന് വാദിച്ചു.
കേസ് അന്വേഷണം അവസാനഘട്ടത്തില് എത്തിനില്ക്കുന്ന സാഹചര്യത്തില് തന്റെ കക്ഷി സ്വാഭാവിക ജാമ്യത്തിന് അര്ഹനാണെന്നും അഭിഭാഷകന് ചൂണ്ടിക്കാട്ടി. നടിയെ ആക്രമിച്ച് ദൃശ്യങ്ങള് പകര്ത്തിയ മൊബൈല് ഫോണ് കണ്ടെടുക്കാന് കഴിയാത്തതിനാല് ജാമ്യം നല്കരുതെന്നാണ് പൊലീസ് നിലപാട് സ്വീകരിക്കുന്നത്. എന്നാല് തൊണ്ടിമുതല് കണ്ടെടുക്കാനാകാത്തത് അന്വേഷണ സംഘത്തിന്റെ വീഴ്ചയാണെന്ന് ദിലീപിന്റെ അഭിഭാഷകന് ചൂണ്ടിക്കാട്ടി. കേസിലെ മുഖ്യപ്രതിയായ പള്സര് സുനി ഇപ്പോള് പൊലീസിന് ദൈവമായി മാറിയിരിക്കുകയാണെന്നും ദിലീപിന്റെ അഭിഭാഷകന് വാദിച്ചിരുന്നു.
അറസ്റ്റിലായ ശേഷം ദിലീപ് സമര്പ്പിച്ച അഞ്ചാം ജാമ്യഹര്ജിയായിരുന്നു ഇത്. ആദ്യം അങ്കമാലി മജിസ്ട്രേറ്റ് കോടതിയില് ജാമ്യാപേക്ഷ സമര്പ്പിച്ചു. ഇത് ജൂലൈ 17 ന് തള്ളി. തുടര്ന്ന് ഹൈക്കോടതിയെ രണ്ടുതവണ സമീപിച്ചു. ജൂലൈ 25 നും ഓഗസ്റ്റ് 29 നും ഹൈക്കോടതി ജാമ്യാപേക്ഷകള് തള്ളുകയായിരുന്നു. പിന്നീട് വീണ്ടും അങ്കമാലി കോടതിയെ സമീപിച്ചു. എന്നാല് സെപ്തംബര് 18 ന് അതും തള്ളി. ജൂലൈ 10 നാണ് കേസില് ദിലീപ് അറസ്റ്റിലായത്.
ഡികെ