ഈസ്റ്റര് ദിവസങ്ങളിലും ബ്രിട്ടനില് കടുത്ത ശൈത്യം തുടര്ന്നേക്കാമെന്ന് മുന്നറിയിപ്പുമായി മെറ്റ് ഓഫീസ്. ബീസ്റ്റ് ഫ്രം ഈസ്റ്റെന്ന കാലാവസ്ഥാ പ്രതിഭാസം ഈസ്റ്റര് ദിനങ്ങളില് തിരിച്ചു വരാന് സാധ്യതയുണ്ടെന്ന് മെറ്റ് ഓഫീസ് മുന്നറിയിപ്പ് നല്കുന്നത്. ആര്ട്ടിക്കിന് മുകളിലെ അന്തരീക്ഷത്തിലെ വായു വളരെ പെട്ടെന്ന് ചൂടാകുന്ന സഡണ് സ്ട്രാറ്റോസ്ഫെറിക് വാമിംഗ് (SSW) രണ്ടാമതും പ്രത്യക്ഷപ്പെടാനുള്ള സാധ്യകളുണ്ടെന്നാണ് നിലവിലെ സാഹചര്യങ്ങള് നല്കുന്ന സൂചന. ഈ പ്രതിഭാസം അന്തരീക്ഷത്തിന്റെ മേല്പ്പാളിയുടെ താപനില പെട്ടെന്ന് ഉയര്ത്തുകയും അത് അതിശൈത്യത്തിന് കാരണമാകുകയും ചെയ്തേക്കാം. കഴിഞ്ഞ ജനുവരി മാസത്തിലാണ് അയര്ലണ്ടില് ആദ്യത്തെ സഡണ് സ്ട്രാറ്റോസ്ഫിയറിക് വാമിംഗ് ഉണ്ടായത്. കടുത്ത മഞ്ഞുവീഴ്ച്ചയും ശീതക്കാറ്റുമായിരുന്നു അതിന്റെ പരിണിത ഫലം. സമീപകാലത്തുണ്ടായ ഏറ്റവും വലിയ ശൈത്യത്തിനാണ് കഴിഞ്ഞ മാസങ്ങള് സാക്ഷ്യം വഹിച്ചത്.
ഈ പ്രതിഭാസത്തിന്റെ ഫലമായി രാജ്യത്ത് അതിശൈത്യം തുടരുമെന്നും കാലാവസ്ഥാ വിദഗ്ദ്ധന് സൂചിപ്പിച്ചു. ബീസ്റ്റ് ഫ്രം ഈസ്റ്റ് തിരിച്ചു വന്നേക്കുമെന്ന ഹാഷ്ടാഗിനൊപ്പമാണ് അദ്ദേഹം ഈ സൂചനയും നല്കിയിരിക്കുന്നത്. വരുന്ന വാരാന്ത്യങ്ങളില് കനത്ത മഞ്ഞുവീഴ്ച്ച ഉണ്ടായേക്കുമെന്ന് തന്നെയാണ് കാലാവസ്ഥ ചാര്ട്ടുകളും വ്യക്തമാക്കുന്നത്.
ഈ വര്ഷം ഈസ്റ്റര് കുറച്ചു നേരത്തെയാണ്, അതുകൊണ്ടു തന്നെ ഇത്തവണത്തെ ഈസ്റ്റര് മഞ്ഞുമൂടിയ ദിനങ്ങളായി മാറാനുള്ള സാധ്യതയാണ് കാലാവസ്ഥ നിരീക്ഷകര് മുന്നോട്ടു വയ്ക്കുന്നത്. മറ്റൊരുതരത്തില് പറഞ്ഞാല് താപനില ശരാശരിയിലും താഴെ മാത്രമെ ഇത്തവണ പ്രതീക്ഷിക്കേണ്ടതുള്ളു. മിനി ബീസ്റ്റ് ഫ്രം ഈസ്റ്റ് രാജ്യം വിടാനൊരുങ്ങി നില്ക്കുന്ന സാഹചര്യത്തില് അതിശൈത്യം വിതക്കാന് പ്രാപ്തിയുള്ള മറ്റൊരു കാലാവസ്ഥാ പ്രതിഭാസം നോര്ത്തില് രൂപപ്പെട്ടു കൊണ്ടിരിക്കുകയാണ് . അയര്ലണ്ടിലെ ഈസ്റ്ററിനെ മഞ്ഞില് മൂടാന് കഴിയുന്നതാണ് പുതിയ പ്രതിഭാസം. നിലവില് താപനില പതുക്കെ ഉയര്ന്നുകൊണ്ടിരിക്കുകയാണ് പക്ഷേ ഇത് അന്തിമമായൊരു മാറ്റത്തിലേക്കുള്ള തുടര്ച്ചയല്ല. ഈസ്റ്ററിന് ക്രിസ്മസിന് ഉണ്ടായതിനേക്കാള് വലിയ മഞ്ഞു വീഴ്ച്ച ഉണ്ടായേക്കാമെന്നും കാലാവസ്ഥ നിരീക്ഷകര് പ്രസ്താവിക്കുന്നു.
ഡികെ